ដោយមើលឃើញវិស័យសំណង់នៅកម្ពុជាមានការរីកចម្រើនខ្លាំងពីមួយឆ្នាំទៅ មួយឆ្នាំនោះ មានក្រុមហ៊ុនជប៉ុនមួយបានសម្រេចបើករោងចក្រផលិតឥដ្ឋការ៉ូឡានៅ កម្ពុជា ដោយមានទុនវិនិយោគក្នុងដំណាក់កាលដំបូងចំនួនជាង1លានដុល្លារ។
លោក យ៉ា ប៉ឹសាមិ គីយូណូរិ ប្រធានក្រុមប្រឹក្សាភិបាលក្រុមហ៊ុន អូម៉ូរ៉ា ខនគ្រីដ ខូអិលធីឌី ដែលមានទីតាំងស្ថិតក្នុងស្រុកកៀនស្វាយ ខេត្តកណ្តាល បានមានប្រសាសន៍ថា ការបើករោងចក្រផលិតឥដ្ឋការ៉ូឡា ជាលើកដំបូងនៅកម្ពុជានេះ គឺដោយសារក្រុមហ៊ុនសង្កេតឃើញថា នៅកម្ពុជាមានតម្រូវការឥដ្ឋការ៉ូឡាច្រើន ខណៈសព្វថ្ងៃឥដ្ឋប្រភេទនេះមានការនាំចូលច្រើនពីបរទេស។ រោងចក្រផលិតឥដ្ឋការ៉ូឡានេះបង្កើតឡើងក្នុងគោលបំណងដើម្បីផ្តល់នូវ ការងារសម្រាប់ប្រជាពលរដ្ឋខ្មែរ និងជួយលើកកម្ពស់សេដ្ឋកិច្ចកម្ពុជាផងដែរ។
លោកបាននិយាយថា ៖ “ក្នុងជំហានដំបូងនេះក្រុមហ៊ុនបានបោះទុនវិនិយោគចំនួនជាង1លានដុល្លារ និងមានបុគ្គលិកកម្មករចំនួន24នាក់។ សម្រាប់ឆ្នាំបន្ទាប់នៅពេលដែលក្រុមហ៊ុនដំណើរការពេញលេញក្រុមហ៊ុនមាន ផែនការនឹងជ្រើសរើសបុគ្គលិកកម្មកខ្មែរឱ្យបានយ៉ាងតិច100នាក់ បន្ថែមទៀត។
លោកក៏បានបញ្ជាក់ដែរថា ក្រុមហ៊ុនរបស់លោកផលិតឥដ្ឋបេតុង (ឥដ្ឋការ៉ូឡា) សម្រាប់ក្រាលសួនច្បារ ក្រាលមុខសំណង់លំនៅឋាន សំណង់រដ្ឋ អគារមន្ទីរពេទ្យ សាលារៀន ការិយាល័យ មន្ទីរការងាររដ្ឋ និងបរិវេណក្រសួងនានា ព្រោះក្រុមហ៊ុនសង្កេតឃើញថា នៅកម្ពុជាកំពុងមានតម្រូវការខ្ពស់ ហើយមានវត្ថុធាតុដើមច្រើននៅក្នុងស្រុកសម្រាប់ផលិតលក់ចេញជូនពលរដ្ឋ ក្នុងតម្លៃថោកសមរម្យ មានគុណភាពរឹងមាំ និងប្រកបដោយស្តង់ដារអន្តរជាតិមិនចាញ់ឥដ្ឋការ៉ូឡាដែលនាំចូលមកពី ប្រទេសជិតខាងកម្ពុជាឡើយ។
បច្ចុប្បន្នក្រុមហ៊ុនអាចមានសមត្ថភាពផលិតបានដល់80តោនក្នុងមួយថ្ងៃ។ នៅពេលខាងមុខក្រុមហ៊ុនក៏មានគម្រោងសាងសង់រោងចក្របេតុងសើម ដែលអាចមានសមត្ថភាពផលិតបាន100តោនក្នុង1ថ្ងៃ។
ឯកឧត្តម យូជី គូម៉ាម៉ារូ ឯកអគ្គរាជទូតព្រះរាជាណាចក្រជប៉ុនប្រចាំកម្ពុជា បានមានប្រសាសន៍ថា ការសម្រេចចិត្តបើកអាជីវកម្មផ្គត់ផ្គង់ និងផលិតសម្ភារពាក់ព័ន្ធផ្សេងៗដើម្បីប្រើប្រាស់ក្នុងស្រុករបស់ ក្រុមហ៊ុន អូម៉ូរ៉ា ខនគ្រីដ ខូអិលធីឌី នេះគឺពិតជាជម្រើសមួយដ៏ត្រឹមត្រូវក្នុងការចូលរួមលើកកម្ពស់ សេដ្ឋកិច្ចកម្ពុជា។
លោកបានថ្លែងថា ក្នុងនាមស្ថានទូតជប៉ុនប្រចាំកម្ពុជា ក៏ដូចជាអង្គការ JETRO អង្គការ JICA និងសភាពាណិជ្ជកម្មជប៉ុន លោកនឹងខិតខំប្រឹងប្រែងធ្វើយ៉ាងណាជួយជំរុញកិច្ចសហការ ក៏ដូចជាធ្វើឱ្យទំនាក់ទំនងរវាងព្រះរាជាណាចក្រកម្ពុជា និងព្រះរាជាណាចក្រជប៉ុន កាន់តែមានភាពខ្លាំងក្លាបន្ថែមទៀត។ លោករំពឹងថា ក្រុមហ៊ុនជប៉ុនមួយនេះនឹងចូលរួមចំណែកយ៉ាងសកម្មដល់ការអភិវឌ្ឍក៏ដូចជា ចូលរួមលើកកម្ពស់ដល់កំណើនសេដ្ឋកិច្ចនៃប្រទេសកម្ពុជាផងដែរ។
ឯកឧត្តម ជាវ តាយ អភិបាលរងខេត្តកណ្តាល បានមានប្រសាសន៍ថា ខេត្តកណ្តាលជាតំបន់មួយមានសក្តានុពលខ្លាំងលើវិស័យឧស្សាហកម្ម ជាពិសេសហេដ្ឋារចនាសម្ព័ន្ធដឹកជញ្ជូនទាំងផ្លូវគោក និងផ្លូវទឹក។ ដោយឈរលើទីតាំងភូមិសាស្ត្ររបស់ខ្លួននៅជាប់រាជធានីភ្នំពេញ ធ្វើឱ្យខេត្តកណ្តាលក្លាយទៅជាទីតាំងមួយដ៏មានសក្តានុពលសម្រាប់ វិនិយោគ។
ឯកឧត្តមបានបញ្ជាក់ថា ៖ “បច្ចុប្បន្នវិស័យឧស្សាហកម្មមានការរីកចម្រើនគួរឱ្យកត់សម្គាល់ ហើយអាជ្ញាធរខេត្តកំពុងលើកកម្ពស់ឧស្សាហកម្មកែច្នៃម្ហូបអាហារ ភេសជ្ជៈ និងរោងម៉ាស៊ីនកិនស្រូវធំៗផងដែរ ដើម្បីជាការជំរុញលើកកម្ពស់ផលិតផលកែច្នៃក្នុងស្រុក ដែលជាគោលនយោបាយចូលរួមលើកកម្ពស់សេដ្ឋកិច្ចគ្រួសារកសិករ និងផ្តល់ការងារដល់ប្រជាពលរដ្ឋខ្មែរឱ្យបានកាន់តែច្រើន។
កាលពីឆ្នាំ2015 កន្លងទៅទឹកប្រាក់វិនិយោគសរុបក្នុងខេត្តកណ្តាល មានប្រមាណ1,214លានដុល្លារ បើប្រៀបនឹងឆ្នាំ2014 គឺកើនឡើង5%៕
ប្រភព : www.lareine.news
EmoticonEmoticon